သတိပေးတားမြစ်ချက်


မျက်စိတဆုံးကွင်းပြင်ထဲမှာ
ဖုန်မှုန့်တွေအလိပ်လိပ်ပြေးလွှားနေကြတာ
ကားတစီးစီး ဒါမှမဟုတ်

ခင်ဗျားအခုကြည့်နေတဲ့ပြက္ခဒိန်ထဲက
ခုန်ချထွက်ပြေးသွားတဲ့ ဧပရယ်လေရူးကြောင့်ဆိုတာသေချာတယ်
အခုလိုသာယာတဲ့နွေဦးနေ့တွေထဲမှာ
ဘုရားသခင်နဲ့စကားစမြည်ပြောခွင့်ရတဲ့အခါ

လူသားတွေရဲ့စိတ်ပရိုဂရမ်ကိုဘယ်လိုရေးဆွဲသွတ်သွင်းခဲ့သလဲဆိုတာရယ်
သူဆင်းရဲတွေရဲ့နေ့လည်စာနဲ့တည်ခင်းဆက်ကပ်မှုနှစ်သက်သလားမေးကြည့်မယ်

လတ်တလောသတင်းတွေအရ
ကမ္ဘာ့ငြိမ်းချမ်းရေးဟာ  ဘုရားတွေအပေါ်တည်မှီဖြစ်တည်နေသလားဆိုတာမရှင်းလင်းမီ
ရှုပ်ထွေးတဲ့အခြေအနေတခုထဲကိုတိုးဝင်သွားဖို့
ကောလဟာလတွေနောက်ကျွန်တော်တို့တကောက်ကောက်လိုက်နေရတယ်

အခါမဲ့မိုးတိမ်တွေသယ်ဆောင်ရွာချခဲ့တဲ့လမ်းတွေပေါ်မှာ
နွံတွေတင်ကျန်နေတာကြည့်ရင်း
တချို့တွေ နွံထဲဆင်းပျောက်ကွယ်သွားကြ
လူ့စိတ်ဆိုတာကလည်းအသွင်သဏ္ဌာန်မမြင်နိုင်ဘူးမို့လား

ဘုရားရဲ့နှုတ်ကပါတ်တော်တွေအတိုင်း
ကူညီရိုင်းပင်းမှုလေးအနည်းငယ်ကြဲဖြန့်ဖို့တောင်မှ
ခွင့်ပြုမိန့်ကျမလာတဲ့လူသားရဲ့စီရင်မှုတွေထဲမှာ
အခန်းပေါင်းမြောက်မြားစွာပါဝင်တဲ့အတ္တနီတိတစောင်ပွင့်ထွန်းနေပြီ

ဆင့်ကဲဖြစ်စဉ်ရဲ့တိုးတက်ပြောင်းလဲမှုအရ
စောဒကတက်ခွင့်မပြုပါ ။        ။



                                 အဇ္ဇ